बखालि

अलिन्द्र ब्रह्म

 

मिस्टार बिबान बाग्लारि आरो मिसेस माया बाग्लारिया गावबा गावनि खामानियाव सानफ्रोमबो जोबोर मुखुब जानानै थायो। बेनि गेजेरावबो हाबानि बोसोरबा उनाव कनसिभ खालामदोंमोन मिसेस बाग्लारिया। मिस्टार बाग्लारिया गुवाहाटी नोगोरमानि गंसे बेंकाव मेनेजार साख्रि मावो आरो मिसेस बाग्लारिया नोगोरनिफ्राय 45 कि.मि.सो जानगाराव थानाय गंसे कलेजाव एसिस्टेण्ट प्रफेशर साख्रि मावो लोगोसे पि.एइच.डि.बो खालामगासिनो दं। मिस्टार बाग्लारिनि बेंक कुव’टारावनो सानैबो थायो बिथांमोना। नाथाय सानैनिबो मावखुलिनिफ्राय कुव’टारा गोजान जायो आरो नोगोरमानि मटर-गारि, मानसि-दुमसिनि होंगो-दोंगोआव गोबाव सम नांनायलाय सानैबो थाबैनो ओंखारो; फैफिन्नायावबो गोबाव जाबोयो। सानफा थोलो कुव’टारावनो थानो सोलाबा बिथांमोना; फुङावनो सिखारस्लाबमोना दुगैस्रां-लोबस्रां आनान-गसाइखौ एसे खुलुमस्रांनानै साहा लोंनायफाजिनो जागार-जिगार सङै-खावै जानानै थाबैनो ओंखारलाङो। बेबादिनो जेब्लायबो जोबोद मुखुबनि गेजेराव बिथांमोननि संसारा गेबेङै बाला गुदुं बादिनो सोलिनानै दंमोन।

                                                                           <<<0>>> 

मिसेस बाग्लारि बिमाया कुव’टाराव थाफैनाया गोबावसैमोन। फिसाजोआ हाइ-टाइम पेरिअ’डाव दंसैमोन; मेटारनिटि लिभबो लाखाबायमोन। बेनि गेजेरावनो गंसे मेटारनिटि हस्पिटालाव मायाया सासे गेबें हिन्जावसा गथ’ जोनोम होनायसै। गोदान बिमा-बिफाहा सम गैबाङैनि थाखाय बिबैया गथ’नि मुंखौ ‘बिलि’ दोन्नायसै।

दानथाम जिरायनायनि उनाव मिसेस माया बाग्लारिया कलेज रिजइन्ट खालामफिन्नायसै। बिलिया फुंबिलि-मोनाबिलि बिबैनि आदोराव सख्ल’-बख्ल’ जाबोनो हमदों नाथाय नांगौबादियै बिमानि गाइखेर मोनजायैयाव सम-सम खिलु-खुद्रिलु जायो। बेबादिनो बिमानि आन्दोआवनो बिबैनि जोथोनाव जि दानसो बैसोआव आगान होबायमोन बिलिया। नाथाय मायानि न’वाव माया माया जाथाइ जानायसै; सानसेखालि हराव उन्दुनानै थानाय समावनो बिबैया हर्खाब थैनानै थानायसै। बेसेबांबा दुखुनि हांमा सुरै सुरै गाबदोंमोन मायाया; फिसौजो बिलियाबो आला-गला जानानै होख्राव-होख्राव गाबफादोंमोन बिमाजों। मिस्टार आरो मिसेस बाग्लारिया बिमाखौ गामिनि न’वाव लानानै थांनायसै आरो गोथै सह’खौ सावहैनायसै। बिनि दाहा आरो सारादुखौ न’वावनो खुंनायसै।

                                                                                  <<<0>>>

अखाफोर दानसेसो जाबाय, मिस्टार आरो मिसेस बाग्लारिया बिमाखौ अरायनि थाखाय बिदाय होनानै कुव’टाराव फैफिन्नाया। बिमा गैयैयाव बिथांमोना कुव’टारखौनो लांदां लादां मोन्दों। बिलिया बिबैजों थायै थायै बिमा-बिफाजोंनो थाया थाया जालांखाबायमोन। बिबो बिबै गैयैयाव गोसोखौ लांदां लांदां मोनथारदों जानांगौ। सिबाइया हज्रि हज्रि गाबबायबायो हुरा हुरा; बिबैखौनो गोसोखांनानै गावखौनो मोनसे बेसेबांबा गेदेर लाथिख’नि गेजेराव थानायबादि मोन्दोंमोन जाथारनांगौ। मिस्टार आरो मिसेस बाग्लारिया बे बाथ्राखौ लानानै सानहाबनायनि बारा सम गैयामोनब्लाबो बिथांमोनहा मोनसे गेदेर सिन्थायाव गोग्लैदोंमोन- “बिलिखौ सोर जोथोन लाबावनो?!”

सान्नैसो उनाव मायाया गावनि सासे काजिन (बिनानाउ) सायास्रिखौ लिंबोथ’नानै बिलिखौ जोथोन लाहोनायसै। सायास्रिया पण्डिचेरी इउनिभारसिटीयाव एम.ए. फरायगासिनो दंमोन। नाथाय बिहाबो गावनि एम.ए. फाइनेल सेमिस्टारनि क्लास स्टार्ट जागोनखाय जि सानल’ थाथ’नानै थांफिनथारनांगौ। सायास्रिया थांफिन्नायनि उनाव मिस्टार आरो मिसेस बाग्लारिमोनहा आरो गुबुन डमेस्टिक अप्शन थाबावनाय नङा। बेनिखायनो बिथांमोना बि थांनायनि सिगाङावनो जिनै बोसोर बैसोनि बिबारि मुंनि सासे बखालि लाबोनायसै।

मिसेस आरो मिस्टार बाग्लारिया बिबारिखौ बखालि महरै मोन्नानै एसे हां मोन्नायबादि मोन्नायसै। बिथांमोननि जिउनि शेड्यूला सिगांनिबादि नर्मेल जाफिन्नो हमनायसै। मिस्टार बाग्लारिनि पेण्डिं खामानिफोरा लासै लासै सेंनो हमनायसै; मायानि एकाडेमिक डिउटिफोराबो रुंलांनो हमनायसै। बिथांमोननि जिवाव फिसाजोखौ लानानै समनि जा थोब्ले-माब्लेमोन बेखौ सोरबा मिथिब्ला नुब्ला सानफ्लांगौमोन सोंखारिफ्लांगौमोन- “फेदेरनो फोलावनो जोथोन लानो हायाब्ला मानो गथ’ खाङो?!” नाथाय बिथांमोननि थावनियाव थानानै नायोब्ला बेफोरो सिखिरि मानसिनिसो बाथ्रा। बेफोरखौ खोमा होनोबो बिसोरहा सम गैखाया। नाथाय हुरा हुरा बिलिखौ जोथोन लाग्रा बखालि एबा मानसिखौ लानानै सिन्थायाव गोग्लैयो। गोग्लैयाब्लालाय?!?!… माथो खालामनो?? दानसे उनाव बिलिनि गिबि जोनोम सान फालिनायनि लाहार-फाहार जाफुदोंमोनल’। जालायबाय नङाना; मैया मैया बाथ्रा।

#… जौसिन बिजिरसालिनि बिथोनबादियै, से दाननि गेजेराव, 6-निफ्राय 14-सिम बोसोर बैसोनि गासैबो गथ’साफोरखौ दानसेनि गेजेराव फरायसालियाव मुं थिसन्नानै होनांगौ। आरो, बे बैसोनि गेजेराव थानाय जायफोर गथ’फोरा फरायसालि नागारदों बिसोरखौबो बिमा-बिफाया फरायसालियाव मुं थिसन्नानै होफिन्नांगौ। आरोबाव, सोरबा सुबुङा बे बैसोनि गथ’साखौ खामानि मावग्रा महरै लाखिदोंब्ला जिबा साननि गेजेराव बिमा-बिफानो गथायनानै होनांगौ। नङाब्ला, बेबादि सुबुं आरो बिमा-बिफानि सायाव आयेनारि राहा लानाय जागोन। …#

दिनैनि रादाब खौरां बिलाइयाव बेबादि रादाबखौ मोनमारैनो मिस्टार आरो मिसेस बाग्लारिया सान्नायनि लैथोआव थामथि-ब्रैथिसो खेबनि थाखाय गब’बावनायसै। बिथांमोना सानखोलाय-सानख्लायलाय खालामनानै मोनसे गोदान गरन्थ’वाव मोनहैलायनायसै। साननैसोनि उनाव मिस्टार बाग्लारिनि गामियाव थांनानै गामिनि लेखा रोङि सासे सिख्लाखौ लाबोनायसै बिथांमोना। लोगो लोगो बिबारि आरो बि मोन्नांगौ बेथनखौ बिमा-बिफानो गथायनानै फैफिन्नायसै। गोदान बखालिया फैखालि लाइ मैद्रु जानायलाय बिनि मुंखौ लाइस्रि लाखिनायसै। बखालि होनस्ला-स्लाय रुवाथिखौनो होन्जासिगोन नामा बिखौ; बैसोआबो राबाय, ओंखाम-ओंख्रिबो सङोनालाय। जियानो जाया, नोगोराव राइजो जाफैब्लाबो मिस्टार आरो मिसेस बाग्लारिमोना बर’नि मुं दोन्नाय हारिमुखौ एसे लाखिदोंमोन। बुंनायबादिसो जायो, जेरै लाइस्रि एरै मुंजों गोरोबनायमोन बियो; लेखा रोङा जादों, मा जाखो? महर-मोखां गेबें, जिगुसो बोसोरनि अनथाव-थाव बालें-लें बर’ सिख्ला। अन्नायनिबो फुंखाबादि। बिलिखौ फिसाबादि अनसैमोन बियो; दाननैनि गेजेरावनो बिलिया बिनि मोजोमाव मिनि बाला बाला गेलेनायसै; मोनसे मोननै सोदोब बुंनो सोलोंनायसै। बिनि अनसुलि आरो समायना महराव मिसेस बाग्लारियाबो माबा-माबि सानफ्लांलायलांनो सम मोन्नायसै। सोरबा सोरबा “हिन्जावफोरा रुवाथिखौबो बिहारिबादि सानो।” होन्नायबादि मायाया सिं सिं फिसाइहा रुवाथि लाइस्रिजों माबाफोर एफेयार थानो हागौ नामा सानखुमाहोलांनो हमनायसै। सानाब्ला माथो राहा दंबावो बिहामालाय?! बिलिखौ जेरै जोथोन लायो मिस्टार बाग्लारिखौबो जोबोर मानिनायजों सिबियोसै लाइस्रिया। बिथाङाबो अनसोगारोनालाय।

नाथाय मिस्टार आरो मिसेस बाग्लारिनि संसाराव माबासो खुगा नांबाय नामा होन्नानै बुंब्लाबो बांद्राय गोथे फोथायनाय जानाय नङागोन। लाइस्रिया आरो गैलिया। गैलिया मानि बाग्लारिमोननि न’वाव गैलिया। बिमा-बिफाया बिनि जुलिखौ सासे सेंग्राजों थि खालामनानै दोनखानायलाय बिखौ हाबा हरनो थाखाय न’वाव लिंहरफिन्नायसै।

मिस्टार बाग्लारिया लाइस्रिखौ लानानै गामियाव थांनो ओंखारदों; बिखौ न’वाव दोनहैनो। बिलिनि मेगन जराया गाबगैयि मोदैजों सिग्लाबदों; गाबनो अहायाखै बिहा। लाइस्रियाबो हौ हौ गाबफादों- “आयै फिसा, आयै फिसा, दागाब स’ना, दागाब… आं फैफिनगोन, आं फैफिनगोन…” होन्नानै। रुवाथि खोमानांनायनि दुखु आरो बिलिया गाबख’हालायै गाबनायखौ नुनानै मिसेस आरो मिस्टार बाग्लारियाबो राहा गोथे जानानै मेगन फिसिफानांदों।

                                                                           <<<0>>>

मायाया स्नि सान सुथि लानानै फिसाजो बिलिजों न’वावनो थाफादों। नाथाय बे खेबाव बाग्लारि संसारनि मायाया आफोद आफोदसोमोन। फिसाजोआ ना ओंखाम जायो, ना मेथाइ जायो। रिंखांहां-रिंखाङाहां गारांजों “मादै… मादै…” होनबायबायनोल’ नाजायो सिबाइया। बिनि देहाया लोरबां जालांदोंमोन। साननै उनाव मिस्टार आरो मिसेस बाग्लारिया फिसाजोखौ गावसोरनि फेइमलि डक्टरनाव लानानै थांनायसै। बिथाङा बेइसिक ट्रिटमेण्ट होनायसै नाथाय बिनि मोननैसो सिमप्टमफोरखौ नोजोर होनानै बिखौ सासे साइखायाट्रिस्टनो दिन्थिनो थिन्नायसै। अखानायै मिस्टार आरो मिसेस बाग्लारिया बिखौ नोगोरनि सासे मुंदांखा साइखायाट्रिस्ट ड. ए.बि. माक्कारनो दिन्थिहैनायसै।

बिलिनि गासै गोसोआरि बिथाथिखौ आन्जाद खालामनानै आरो बिजिरनानै ड. ए.बि. माक्कारा मिस्टार आरो मिसेस बाग्लारिनो खिन्थानायसैदि बिलिनि जिवाव सासे मानसि फैदोंमोन जायखौ बियो दासिमबो नागिरगासिनो थायो। लोगो लोगो मिस्टार आरो मिसेस बाग्लारिया जाउलियाबादि जाफ्रामनायसै। एसेबां उन्दै समावनो गावसोरनि फिसाखौ साइखायाट्रिस्टनो खिन्थालायनो गोनां जानायनि बिथांमोना सहायनो हायाखैसै। जियानो जाया ड. माक्कारा बिथांमोननो मोनसे एसाइमेण्ट होनायसै; उन्दैनिफ्राय बिखौ सोर सोर खांबोदोंमोन, जोथोन लाबोदोंमोन, बियो माबादि आखु दिन्थियो आरो बियो माबाफोर सोदोब बुंखाङो नामा बेफोरबादि खाइसे बाथ्राखौ ड. माक्कारा बिथांमोन्नाव सोंनायसै। आरो, बेनि फिन्नायखौ साननै उनाव एपइमेण्ट लाफिन्नानै खिन्थानो थिन्नायसै।

मिसेस बाग्लारिया डक्टरनि चेम्बारनिफ्राय कुव’टार मोनफैस्लाबमोना फिसाइखौ बुंनायसै- “जारौ बिफा, आं आरो कलेजाव थांलिया। आंनि रेजिगनेशन लेटारखौ गाबोन सोलाबोब्ला अफिसाव हैब्रबनानै फैदो। नों जा खामायो बेजोंनो जोंनि संसारा सोलिगोन; आं मिथिगौ, आंहा आंनि फरायसाफोरनो फोरोंनो गोबां दं नाथाय आंनि,,, जोंनि फिसाखौ गारनानै नङा। दा, गिबियावनो आं सासे बिमा। … … …।” बिसिनि बाथ्राखौ मिस्टार बाग्लारिया सिरि सिरि खोनांसंगासिनो थानायसै। मायाया गोबाव सम मा-माबि बुंगासिनो थानायनि उनाव बियो फंसेल’ बाथ्रा बुंफिन्नायसै- “संफोर ड. माक्कारखौ लोगो हमनो गोनां दं।”

बाग्लारि संसारनि बाथ्राखौ खिन्थानानै जेरै मेङो खोनासंनानैबो एरै मेङो; खाइफा खाइफायाथ’ बानानै “उनाव खोनासंसिगोन दे।” होन्नानै ब्लदसो थांबावो।

                                                                               <<<0>>>

“हेल’!”

“येस…! ….”

“एम आइ स्पिकिं टु मि. बाग्लारि?”

“येस… यु आर।”

“आइ निड टु ट’क टु यु एबाउट् जिउ। कुड आइ?”

“येस… अब कर्स। बाट, कुड आइ न’ यु फार्स्ट?”

“अह… आ’म… आइम डा प्रिन्सिपाल अब न्यु प्राइमारि श्कुल।”

“अके… थेंक्स! प्सिज…”

“एक्शुयेलि,… सान्नैसो सिगांनिफ्रायनो जों जिउनि एसे एखुथा एखुथा आखुखौ नोजोर होबोदों।”

“एखुथा! एखुथा आखु!! नोंथाङा मा बुंनो सान्दों? मि. जिदुंसा, नोंथाङा मा बुंनो सान्दों?! … आइ मिन,,, बुंदों?!?!”

“आं थारखौनो बुंदों मि. बाग्लारि। बिनि फरायनाय, थाबायनाय, रायज्लायनाय, खारनाय, जानाय गासैयावबो एसे जुदा हारिमुखौ नुनो मोन्दों। जेन’बा जिउवा गंसे म्याशिनसो। जियानो जाया, हायोब्ला सम एसे दिहुन्नानै नोंथाङा गाबोन संफोर बेसिम फै। बेयाव फैब्ला मोजाङै रायज्लायसिगोन। अके?”

“अके, मि. जिदुंसा। थेंक यु।”

मिस्टार आरो मिसेस बाग्लारिया फिसाजो बिलिखौ फरायसालियाव मुं थिसन्नानै होनाया बोसोरथामसो जाबायमोन। फरायसालियाव बिनि मुंखौ जिउ बाग्लारि लाखिदोंमोन। जानो हागौ जिउजों जुजियै जुजियै देरहानायखाय बिनि मुंखौ जिउ लाखिदोंमोन बिथांमोना।

मबाइल फ’नखौ आरांगा सायाव दोनथ’नानै मिस्टार बाग्लारिया दान्दिसे सम गावनि चेम्बारनि बारान्दायाव इसान सोंहैनायसै। दान्दिसे उनाव हर्खाब चेम्बाराव हाबफिन्नानै हरखाबै मबाइल फ’नखौ खनखांनानै फ’न बुकाव नाम्बार नागिरनानै फ’नखौ दोनफिन्नानै गावनि फ’न नाम्बार लिरनानै दोनग्रा दाइरि गांसेखौ बेखेवनानै गावनि मावखुलिनि लेण्डलाइन फ’नजों मोनसे नाम्बाराव डाइल खालामनायसै बिथाङा।

“वेलकाम टु “र’सुम्ज निउ र’बटा एन्टारप्राइस”। हाउ RR555 केन हेल्प यु?”

“हेल’ RR555, डिस इज मि. बाग्लारि! कुड यु फरवार्ड माइ क’ल टु ड. लयिं?”

“येस ब’स, सारटेइनलि।”

“थेंक्स म्यान।”

“म’स्ट वेलकाम मि. बाग्लारि। नाव, प्लिस केट्च हार।”

………………………………………..

“हेल’।”

“हाइ म्याम, डिस इज मि. बाग्लारि।”

“येस, मि. बाग्लारि। प्लिस …”

“ड. लयिं, इज माइ लाइस्रि प्रग्राम्ड इन प्रपार वे?”

“व’ट डु यु मिन?! इज डेयार एनि प्रब्लेम विथ हार?”

“आइ डण्ट एक्साक्टलि न’ राइट नाव। बाट एज डा प्रिन्सिपाल अब न्यु प्राइमारि श्कुल वान्ट्स टु टेल मि, डेयार इज साम प्रब्लेम विथ माइ ड’टार हूम लाइस्रि, आइ मिन RR3017 टेइक्स केयार।”

“अके, आइ सि! हावएभार, आइ केन’ट सेइ एनिथिं राइट नाव। आइम सेण्डिं ए फिल्ड मेकानिकेल्ज टु इयुर प्लेइस। प्लिस लेम्मि न’ आवार टाइम टु एटेण्ड यु।”

“अके, ड. लयिं। थेंक यु!”

“यु आर वेलकाम!”

                                                                           <<<0>>>

“इक्सक्युज मि; आइम मि. बाग्लारि, फाडार अब जिउ बाग्लारि। मेइ आइ काम इन, मि. जिदुंसा?”

“येस, प्लिस फै, नै बेयाव जिरायफै।”

“थेंक यु, मि. जिदुंसा।”

“वेलकाम मि. बाग्लारि। आं नोंथांनिफ्राय जिउनि सोमोन्दै खाइसे बाथ्रा मिथिनो लुबैयो; इफ यु डण्ट माइण्ड, बियो न’वाव नोंथांमोनजों माबादि बिहेभ खालामो, बाइदि बाइदि।”

“आंथ’ बिजों बारा गोबाव सम थानाय जाया मि. जिदुंसा। थेवबो माब्लाबा माब्लाबा खाइसे … … …”

“मानो ब्रेइक हमखो मि. बाग्लारि? नोंथाङा खिन्थानो सानाखैब्ला आं जेबो खालामनो हाया नाथाय आं बिनि फोरोंगिरि; आइ, आनकण्डिशनेलि निड टु न’ एबाउट हार।”

“बाथ्राया एसे लाखोमाथावानो मि. जिदुंसा।”

“नोंथाङा आंखौ फोथायनो हायो; नोंथांनि फिसाजोनि खाथिराव। प्लिस …”

“बिदिब्ला खोनासं नोथां – जेब्ला बिलिया, अर्ताथ जिउवा से खावसे बोसोरनिमोन अब्ला बिहा एसे मेन्टेलि डिस्टार्ब्ड जादोंमोन। … … … जोंनि न’वाव लाइस्रि मुंनि सासे सिख्ला दंफैयोमोन। बिनो जिउखौ A-Z जोथोम लायोमोन। उनाव बि थांनायनि उनाव जिउवा मेन्टेल प्रब्लेमाव गोग्लैदोंमोन। बेनिखायनो ड. माक्कारनाव थांनानै बोसोन लाहैनायाव बिथाङा उनाव मिथिहोबायदि लाइस्रि गैयैनि थाखायनो जिउवा बेबादि जेंनायाव गोग्लैदों। बिथाङा बुंनाय लेखा आं जिउनि थाखाय लाइस्रिखौ लायफिन्नो थांदोंमोन। नाथाय बिनि हाबाया सान्नैसोनि उनावनो जासिगोनखाय बिमा-बिफाया बिखौ फैफिन्नो होआखैमोन। अब्ला आं दुखुजों गिदिंफिन्दोंमोन। अखानायै, ड. माक्कारनाव एपइमेण्ट लाबावनानै आं मिसेस बाग्लारिखौ लोगोआव लानानै बिथांखौ लोगो हमहैनायसै। बैखालिनो, खोथाथे-बाथ्राथे ड. लयिंनि बाथ्रायाबो ओंखारनायसै। दान्दिसे सम रायज्लायनि उनाव जों मोनसे गरन्थ’वाव फैदोंमोनदि जिउवा एसे देरसान्दि बिखौ जोथोन लानो थाखाय अल्टारनेटिभलि लाइस्रिबादि मोनसे र’बटनि हेफाजाब लानो हायो। बेनिखायनो लाइस्रिबादि मोनसे र’बट बानायनो थाखाय आं “र’सुम्ज निउ र’बटा एन्टारप्राइस”नि बिगोमा ड. लयिंखौ खावलायो। लाइस्रिनि महर-मोखां, गारां, बिगुरनि गाब, खानाय, गासैखौबो र’बटजों गोरोबहोनो थाखाय आं गामियाव थांब्रबनानै लाइस्रिखौ सानसेनि थाखाय लाबोनानै ड. लयिंनि लेबरेटरियाव होफैयो। आरो, सान्नैसोनि उनावनो बिथाङा जोंनो लाइस्रिबादि मोनसे र’बट बानायनानै हरो। बेबादिसो जों फिसाखौ फोथांदोंमोन।”

लोगो लोगो मि. बाग्लारिया सासे उन्दै गथ’बादि गब्थब-थब सिरि थाहाबो। मि. जिदुंसाया जेबो ए-उ सोदोब खालामालासे बिथांनि बाथ्राखौ खोनासंगासिनो दंमोन।

“दाबो जिउवा बे र’बटजोंनो थायो नामा?”

“औ!”

“सरि, बाट, हायोब्ला नोंथाङा जिउखौ बेनि जानगाराव लाखिनो नाजाहोलांनाया गाहामसै नामा मि. बाग्लारि?! मानोना, बियो दा देरबाय-लावबाय; बिहा बुजिनो हानाय, गावनि सान्नायखौ फोरमायनो हानाय जाबोबाय। स’, आइ थिंक, …”

“लाखियोब्ला माबा खहा जागोन नामा?”

“बेनिखायनोथ’ नोंथांखौ आं दिनै लिंहरदों। नाय, नोंथांनि फिसाजो जिउवा अलरेडी मानसिनि हारिमुखौ गारनानै र’बटिक काल्शारखौसो गोबादों; आरो बेनिख्रुइ मा खहानि बाथ्रा थाबावनो?! माबा मोनसे कुयेशन सोंनायाव हायाब्ला बियो मा फिन्नाय होयो मिथिबाय?”

मि. बाग्लारिया सिरि थायो आरो मि. जिदुंसाया बुंफिनो।

“केन’ट प्रसेस।”

“हे इसोर! नोंथाङा मा बुंखो?!”

“येस, डेट्स ट्रु।”

“बिदिब्ला! दा,,, मा खालामनाया हामगोन मि. जिदुंसा!!”

“नोंथांमोना जिउखौ जोंनि हस्टेलाव दोननो हायो; जों बिखौ जेसेबां हायो एसेबां लाइस्रिनि बाथ्राखौ बावहोनो नाजागोन। शि केन स्टेइ हेयार सेइफ। आइ प्रमिस्।”

साननै उनाव मिस्टार आरो मिसेस बाग्लारिया जिउखौ न्यु प्राइमारि श्कुलनि गंसे हस्टेलाव दोनहैनायसै नाथाय र’बट लाइस्रिखौ न’वावनो लाखिथ’नायसै।

***

AKSHRA
error: Content is protected !!