मिसमेत्च

अलिन्द्र ब्रह्म

इटिया सम सम गावनि समायना-रमायना सावगारिफोरखौ गावनि फेइसबुक एकाउन्टाव आपल’ड खालामस्रायो। ओरैनोथ’ बियो जोबोद समायनाखा; फार्सेथिं फट’शपाव एडिट खालामनानै होबावोसो माब्लाबा माब्लाबा। बिनि एकाउन्टखौ जाखांफुनाय सेंग्राफ्रा बाथ-रुममानि, कुमुडाव मानि जिरायस्रानानै एण्ड्रइड मबाइलाव ब्राउज खालामै खालामै नायसै; बोरायदबनाय साख्रिआवलाफ्रा गावसोरनि मावख’फ्राव सानफायाव खनसेब्लाबो बिनि एकाउन्टखौ भिजिट खालामसै; सिख्ला-आइथाफ्राबो सेर फाखाय फाखाय बिनि मेइक-आप मेइक-अभार नायनानै लासै।

इटिनि बेबादि हाइ-प्रफाइल फेइसबुक एकाउन्टखौ एनी टाइम खेवना दोनखानानै गोसोबानो नायग्रानि अनजिमायाबो बांबोनो हमनायसै। बेजों लोगो लोगो इटिनि एक्सट्रा ल’डाबो लिरबोनो हमदोंमोन। हुरा-हुरा डक्टरा दाद्रि होयै होयै लिंहरनो हमसै बिखौ। नाथाय गैया फेइसबुकाव मुखुब जाबोनो हमनानै सानफा-एफा गारियासो जालांनो हमदोंमोन बियो।

***

     इटिया ड. सुदेम कसारिनि प्राइभेट सेक्रेटारि। दाननैसो जाबाय ड. कसारिया बिखौ गावनि प्राइभेट चेम्बाराव लानानै फैनाया। बिनि आबुं मुङा आर.-इ.टि.-2बि.। समायनासिननिख्रुइ समायना आइजो सेक्रेटारि नागिरै नागिरै गावनो साबसिन-हामसिनै दानानै लाबोनायबादि बाथ्रासो आरोमा। इटिनि मोखांखौनो नायस्रायै नायस्रायै साफ्रोमबो बेरामिफोरखौ मिनि-खुसि नायसै ड. कसारिया। सानफ्रोमबो फुंबिलिनि 8 बाजिनिफ्राय एराउण्ड-डा-क्ल’क डक्टरनि गासै खामानियावनो मुखुब थानानै मोनाबिलि समाव सार्ज थांहां थांहां जालायसै इटिहाबो। डिउटिनि उनाव ड. कसारिया बिखौ गावनि न’वावनो लानानै थाङो। माब्लाबा माब्लाबा डक्टरा बिखौ चेम्बारनि नसुंसेयाव थानाय मोनसे फिसा खथायावबो गालाङो। बेयावनो ड. कसारिया गावनो होखानाय गंसे पि.सि.याव फेइसबुक ब्राउज खालामनानै माब्लाबा माब्लाबा हरफा थोलो थायो बियो: जाया, लोङा आरो उन्दुवा! ड. कसारिया गावनि मेडिकेल एचिभमेण्ट आरो ट्रिटमेण्ट प्र’सेसखौ प्रम’ट खालामनो थाखाय फेइसबुकाव मोनसे पाब्लिक पेइज खेवनानै लादोंमोन; बेखौनो हर हराव इटिया मेनटेइन खालामोमोन। बे फेइसबुक पेइजखौ मेनटेइन खालामै खालामैनो बे पेइजखौ ‘लाइक’ खालामग्रा सुबुंनि प्रफाइफोरखौबो भिजिट खालामसै बियो। बेबादिनो मैया एसे, दिनै एसे आरो गाबोन एसे नायै नायै फेइसबुकाव गोसो जलांनायसै बिहा। सानसेखालि हर गेजेराव ड. कसारिखौ हर्खाब क’ल खालामनानै बुंनायसै बियो-

“हेल’ ब’स। आंहा नोंथांजों मोनसे गोनां बाथ्रा सावरायनो दंमोन।”

“मा बाथ्रा?! गाबोन रायज्लायजाया होमब्ला?”

“जायो। नाथाय आं दानि बाथ्राखौ दानो रायज्लायनो लुबैयो।”

“बुं इटि; मा बाथ्रा…”

“आं आंनि मुङाव मोनसे फेइसबुक एकाउण्ट खुलिनो सान्दों। खुलिजागोनना ब’स?”

“बेनि सोमोन्दै गाबोन फुङाव रायज्लायगोन। अके?”

“नाथाय…”

“न नाथाय, वमोन। मानसिया एसेबां हराव रायज्लाया। गुड नाइट!”

“हेल’… हेल’… हेल’… … … गुड नाइट! ब’स…”

ड. कसारिया फ’नखौ दहमैनो दान्नायसै। पि.एस.जों एसेबां हर थौनाय समाव फ’नाव रायज्लायनांनायजों आरो बिसिया एसे मोदोम सानेरनायजों एसे मेव-मेव मोनखांदोंमोन डक्टरा; थेवबो गोसो सिङावनो “मिथिमालाय, मा साननो बिलाय?” होन्नानै दुमफ्ला उन्दुफिन्नायसै। थेवबो, गावनि पि.एस.-आ मानो एसेबां हर गेजेराव फेइसबुक एकाउण्ट खुलिनो सान्दों बेखौनो सायावनो सा सानै सानै एसे निन्गोमा जादोंमोन बियो। फार्सेथिं इटिया फेइसबुक एकाउण्ट खुलिनो नागिरनाय बाथ्राखौ गोर्लैयै लानो हायाखैमोन बियो। बेयो ड. कसारिनि थाखाय जेसेबां जिंगा सिथाव बाथ्रामोन बेनिख्रुइ जोंनि थाखाय जिंगा सिथावसिन बाथ्राया बेसोदि इटिया फेइसबुक एकाउण्ट खुलिनायाव ड. कसारिहा मा खर’ सानो गोनां दं। नाथाय गावनि पि.एस.-नि बाथ्रा गावसो मिथिसिगौ। जानो हागौ, ड. कसारिया गावनि पि.एस.-खौ लानानै जोबोद पजेसिभ बा माबा मोनसे एबा मोननै-मोन्थामसो टेकनिकेल जाहोनफोर थानो हागौ।

अखानायै, गावनि चेम्बारनि लांगोना मोनफैग्रो मोना थोंजोङै इटिनि सेलाव थांनायसै बियो।

“गुड मरनिं ब’स!” — ड. कसारिखौ नुग्रोमोना बरायनायसै इटिया।

“गुड मरनिं! नों मानो फेइसबुक एकाउण्ट खुलिनो सान्दों?” — जेबो उफ्रा बाथ्रा सावफ्लेयालासे सासे मेकानिकेल मानसिबादि थोंजोङैनो सोंखानायसै ड. कसारिया।

“मानसिफोरबादि आंबो ससियेल नेटवर्काव हाबनो लुबैयो।”

“अके!”

“स, केन आइ?”

“लेट्स सि इट लेटार।”

बेबादि बुंनानै सोरनिबा खुगायाव एम्फौफोर बारसन्नायबादि गावनि चेम्बाराव थ्रोब हाबहैनायसै ड. कसारिया। ड. कसारिनिफ्राय मोनबो रोखा रिप्लाइ मोनैलाय इटिनि मेमरि सिस्टेमा दसे समनि थाखाय आवबा जानायसै। हजों ड. कसारिया दान्दिसे सम गावनि चेम्बारनि रिसिभारजों मुखुब जाहैनायसै। ब’स आरो बिनि पि.एस. सानैबो मोनसे साननो गोनां बिथाथियाव गोग्लैदोंमोन। दान्दिसे उनाव ड. कसारिया इटिखौ गावनि चेम्बाराव लिंहरनानै बुंनायसै-

“नों फेइसबुकाव एकाउण्ट खुलिनो हागोन नाथाय, राइट नाव, यु केन’ट शेयार युर आइडेनटिटी एण्ड फर साम सेक्युरिटि रिजन्ज, नों रावजोंबो चाट खालामथ’नो हानाय नङा। आरो, गोसोआव ला, न’बडि केन राइट इन युर वाल आरो रावबो नोंनो मेसेज हरनो हाया। आइ विल ट’क टु डा साइख’ल’जिस्ट टुनाइट।”

“थेंक यु ब’स। आं गासैखौबो गोसोआव लाबाय।”

“यु आर वेलकाम। …आरो मोनसे बाथ्रा, बि केयारफुल।”

“अ…के…!!” — ब’सनि बेफोर बाथ्रायाव इटिया बारा कम्फरटेबोल मोनाखिसै।

गावनि पि.एस.-आ फेइसबुक एकाउण्ट खुलिनो नागिरनायाव सासे डक्टरहा मानो एसेबां जिंगा; साइख’ल’जिस्टजों रायज्लायनो नांलायबावगौ; थारैनो भेरि स्ट्रेइन्ज। जानो हागौ बांसिन मानसिया फेइसबुकाव अराय सम मुखुब थानानै गावनि खामानि-दामानि बावलांनाय बादिनो इटियाबो गावनि मावनांगौ डिउटिखौ बावनानै फेइसबुकनि बिउटिखौ नाजावगोन होन्नानै ड. कसारिया सान्दों। नङाब्लालाय गावनि बेसेन गोसा समखौ आद्रि खालामनानै मानोथो एसेबां सिन्था बिहालाय! ना सोरजोंबा उरायलांजानो गिदों गावनि सुन्दरि प्राइभेट नेहाथारिखौ!!

नाथाय जाय जाथाइखौ ड. कसारिया गिगासिनो दंमोन सिंजों सिं बिनि पि.एस.-आ बेखौनो मावनो सानगासिनो दंमोन। देहानि जाय बाहागोआव आखाइजों खुरहरनो हाया बै बाहागोआवनो बांसिन मानो होन्नायबादि जाय जाय अप्शनफोरखौ ब’सा बाहायनो होआखैमोन बेफोरखौसो बांसिनै बाहायनो गोसो जानायसै इटिहा। जियानो जाया ब’सनि गाइडलाइनखौ मानिनानै गावनि एकाउण्टखौ खुलिनानै लानायसै बियो। आरो, गावनि लेपट’पनि वेबकेइमजों गावनिनो मोनसे सावारि खेबनानै प्रफाइल फट’ होनायसै। लासै लासै साफा सानैनो फ्रेण्ड रिकुएस्टबो हरहोलांनो हमनायसै। लोगो लोगो गोबां सेंग्रा लोगोसे सिख्लाफ्राबो बिनो फ्रेण्ड रिकुएस्ट हरनायसै। बेबादिनो सम सम गुबुन गुबुन सुबुंफोरनि प्रफाइल भिजिट खालामै खालामै सफ्थाहसेसोनि गेजेरावनो फेइसबुक नायनाया बिनि हुदाबादि जालांनो हमनायसै। बे सफ्थाहसेनि गेजेरावनो बियो मानसिफोरनि गुबुन गुबुन प्रफाइलनि सोमोन्दै नायनानै लानायसै। बेफोरनि गेजेराव ‘स्टेटास’, ‘रिलिजन’, ‘एबाउट मि’, बाइदि अप्शनाव थानाय इन्फरमेशनफोरखौ नायनानै बियो सोमो नांदों आरो गावनावनो बायदिसिना सोंथि सोंदों: ‘आंनि स्टेटासा मा?’, ‘आं गुबुनफोरनि बादि स्टेटास सोलायनो हागोनना ना हाया?’, ‘आंनि रिलिजना मा?’, ‘आं सोर?’, ‘आंहा गुबुनफोरनि बादि सिब्लिंज दंना गैया?’, बाइदि बाइदि। बिनि बेफोरबादि सोंथिफोरनि फिन्नायखौ ब’सनि थफ्लासे कण्डिशनफोरा गाथेनानै दोनखादों। बेनिखायनो सम सम बियो ड. कसारिनाव सोंहोलांदों-

“केन आइ शेयार साम अब माई पार्शनेल थिंज विथ माई फ्रेण्ड्ज?”

“सार्टेइनलि नट।”

ब’सनि बेबादि गोदोना सेरथेनानै दोन्नायबादि फिन्नाया इटिनि गोसोआव बायदिसिना सानबोलाउरि सोमजिहोग्रा जालांदों। लासै लासै गावनि उदांस्रि गोमानाय बादि मोनलांनो हमदों इटिया; गोसोआव दुखुनि मोन्दांथि सोमजिनो हमलांदों। बेबादिनो ब’सनि हेंथायै खायसे सानस्रिबो जाखांफैनो हमदों बिनि गोसोआव। सान्नैसोनि गेजेराव गावनि समायना-रमायना सावगारि आपल’ड खालामनो हमनायसै बियो।

सानसेखालि ड. कसारिनि गोसोआव मोनसे बाथ्राया गेलेफैनायसै। बेनिनो जाउन बादियै बियो फेइसबुकाव मोनसे फेइक एकाउण्ट खुलिनानै लानायसै आरो इटिखौ फेइसबुक फ्रेण्ड खालामनानै लानायसै। बेजोंनो बियो गावनि बेसेन गोसा समखौ एसे आद्रि खालामनानैब्लाबो इटिनि प्रफाइलखौ सम सम चेक खालामनो हमनायसै। अब्लासिम इटिनि इनबक्साव अनजिमा गैयि मेसेजफोरा सौफैखाबायमोन। नाथाय बेसेरा ड. कसारि! इटिनि इनबक्सावथ’ हाबनानै नायनोबो हाया। बियो बेखौल’ सान्नानै गोजोन्नाय मोन्दोंमोनदि गाव होखानाय कण्डशनफोरखौ इटिया भायलेट खालामाखै। थेवबो बिनि फट’फोरखौ नुनानै गावनि गोसो सिङावनो एसे बेरेखा जादोंमोन बियो।

***

   #हाइ, इटि… मा खौरां?#

बिरदाउ दैमारिया इटिनि मेसेज बक्साव लिरहरदों। नाथाय इटिया मोनबो रेसपन्स होआखैसै। थेवबो मेंनानै लाजिनानै थाफिनाखै बिरदाउवा। इटिनि प्रफाइल फट’खौ नुनानैनो खिथु गारैबादि खनले-खनले गले-गले मेसेज हरसै सिबाया नाथाय मोनबो रेसपन्स होजायाखै।

सान्नैसो उनाव बिरदाउनि न’न-स्ट’प मेसेजफोरखौ मोनगासिनो थानानै रिप्लाय हरफिननो गरन्थ लानायसै इटिया; लिरहरनायसै-

#आं नोंनि मेसेजफोरखौ मोनगासिनो थादों नाथाय खामानियाव मुखुब जानायलाय रिप्लाय हरफिन्नाय जायाखैमोन।#

बेबादि मोनसे रिप्लाय हरनायनि उनाव बेसेबांबा सानसिम सिरि थाथ’दोंमोन इटिया नाथाय बिरदाउवा मेसेज हरफिनगासिनो थानो गाराखै। सानफ्रोमबो गावनि मेसेज बक्सखौ चेक खालामसै बियो; इटिनि मेसेजे मोनगौबा मोनगौबा। उनाव गावनि गोसोनि बाथ्राखौ खेंसालियायै फोरमायहरनो होन्नानै इटिनो एसे गुबुन रोखोमनि मेसेज हरबावनायसै बियो।

#नों मानो सिरि थाफिनखो? नों मानो जेबो फिन हरा? … … … आइ रियेलि ‘लाइक’ यु… कुड आइ न’ युर स्टेटास प्लिस?#

बे खेबाव ‘स्टेटास’ सोदोबा इटिनि गोसोआव मोनसे गुबुन रोखोमनि क्लिक खालामनायसै। बियो गुबुनफोरनि स्टेटासफोरखौ नायनो हमनायसै। आरो, मोनसे समाव गावनि स्टेटासाव ‘सिंगोल’ टाइप खालामनानै दसे माबा सानहाबनानै डिलिट खालामफिन्नायसै। आरो बिरदाउनि इनबक्साव लिरनायसै-

#सिंगोल#

मेसेजखौ मोनग्रो मोना बिदाउवा गावनि गोसोखौ एसे रेजें मोन्नायसै आरो लोगो लोगो लिरहरफिन्नायसै-

#थेंक गड!#

#हवाट डु यु मीन?#

#बेनि ओंथिखौ नों टु वे लानो हायो।#

#माबोरै?#

#मोनसेया जाबाय- नों आंजों चाट खालामबाय।#

#आरो…#

#यु आर सिंगोल।#

#स, हवाट?!#

#आइ लाइक यु।#

बेबादिनो फेइसबुकाव चाट खालामै खालामै इटि आरो बिरदाउनि गेजेराव गोसो थोलायनाय सोमोन्दो जानायसै।

ड. कसारिनि चेम्बारा रबिबाराव बन्द थायो। ओइदिनखालि इटिया गावनि सेलावनो माबा नङा माबा मोनसे खालामनानै थाग्रामोन; एखम्बा खाथिनि सिटि पार्काव बेरायहैग्रामोन। नाथाय दानिया गावनि सेलाव थाब्ला फेइसबुकावनो बिजि थायो; हजों पार्काव ओंखारलांब्ला सेर फाखाय फाखाय बिरदाउजों लोगो हमलायहैयोमोन। सानसेखालि बिरदाउवा ब्रा-ब्रा लिंनायाव नोगोरनि गुबुन गंसे माब्लाबाबो गाव थांफेरि पार्काव थांनायसै इटिया। बिसोरो पार्कनि थरसे अन्थाइ थाफायाव जिरायनायसै आरो बिरदाउवा लासै लासै इटिनि लावसें-लावसें आसिफोरखौ बाख्नायनाय सोलोजों बिनि आखाइयाव हमनायसै आरो गोसो गोर्बोनि बबेबा खनायाव फिसिनानै दोन्नाय फोरमायनो फोरमायनो होन्नानै सानगासिनो थानाय गोसो थोनायनि खौरांखौ बुंनो सान्नानै माबा बुंनांगौ माबा फंसे बुंनायसै-

“नोंनि आखाइया दैमुनि दैबादि जोबोद सुदेम।”

“गुबुन सिख्लाफोरनि मोदोमा गुदुं नामा?!” — इटिया लाजिनायबादि दिन्थिनानै गावनि आखाइखौ बोबोनानै मा बुंगोन मा मागोन बुंनायसै।

बेबादिनो पार्कनिफ्राय बबेबा रेस्टराँ, बबेबा गुबुन पार्कफ्राव आखाइ हमलायनानै खुगा रुजु रुजु गोसो-गोर्बोनि खोथा फोरमायलायग्रा जानायसै बिसोर। रबिबार फैब्ला बहाबा थांनांगौ प्रग्राम थाखाग्रा जाबाय दानिया इटिहा।

***

     “हेल’, आं मि. बक्सिया बुंदों।”

“येस, मि. बक्सि। प्लिस…”

“अ, ड. कसारि! मोनसे गोनां बाथ्रा दंमोन।”

“दे बुंनाय मि. बक्सि।”

“नोंथांनि पि.एस. आइ मीन आर. इटिया दिनै बबेयाव बेरायहैदों खिन्थानो हागौमोन नामा?”

“मानो?! नोंथाङा लकेटरखौ चेक खालामाखै नामा?”

“खालामदों; बेनिखायनोथ’ सोंदों।”

“यु मीन?!”

“नोंथाङा मिथियोना मिथिया बेखौनो कनफार्म खालामनो थाखाय सोंनाय जादों। हार लकेशन इज फ्रेकुएण्टली चेन्जिं राइट डिज डेइज।”

“अ!! माई!! गड!!”

“एनिवे, प्लिस टेइक केयार अब हार।”

ड. कसारिया माथा गरम जाखांनायसै। लोगो लोगो बाइदिसिना सन्देहवाव गब’नो हमनायसै बियो। इटिया बबेयाव बेरायनो थाङो?! सोरजों थाङो?!? बिहा माबा सोलायनाय फैदों: माबादि सोलायनाय फैदों?!?! बेफोर सानबोलाउरि आरो सोंलुफोरा होंगो-दोंगो जाखांफैदों बिनि खर’-मेलेमाव। थेवबो बियो जेबो सोंला-सोंलि खालामालासे दानिया रबिबार रबिबाराव इटिखौ गावजोंनो बेरायनो लांग्रा जानायसै आरो बेबादिनो बिखौ गावजों बिजि लाखिनो सोलो खालामनायसै। फिसाइया इटिखौ बेबादि गावजोंनो मुखुब लाखिनायखौ नुनानै हजों ड. कसारिनि बिसिया फिसाइखौ सन्देह खालामनायाबो हामथारलियामोन।

इटिया दानिया ड. कसारिनि खाथिनिफ्राय एसेबो दोरोदनो हायि जालांबाय। फार्सेथिं बिरदाउवा थाथेरनो हायि जालांबाय। बेनिखायनो गावनि खुरमा-बाहागि, लोगो-लोब्बाफोरा एसे-एनै बेरामाव गोग्लैब्ला गावनो ड. कसारिनि चेम्बाराव लानानै थांसै बियो। रावहाबो बेमार-आजार जाथाराब्लाबो गावनि आखाइ-आथिंफ्राव दुखु फोनांफ्लानानै ड. कसारिनि चेम्बाराव थांनानै नायजाहैसै। जाहोना मोनसेल’: इटिखौ लोगो हमनाय। नाथाय बेबादि खालामनायावनो खालामनायावनो ड. कसारिहा बिनि फार्से एसे सन्देह जानायसै आरो बिखौ फेइसबुकाव सार्च खालामनानै गावनि फेइक एकाउण्टजों फ्रेण्ड खालामनानै लानायसै; लोगोसे बियो इटिनिबो फेइसबुक फ्रेण्ड बेखौ मिथिनानै लानायसै।

डिउटि जोबनायनि उनाव ड. कसारिया इटिखौ सानफ्रोमबो गावनि न’वावनो लांफाग्रा जानायसै आरो बिखौ मोजाङै नोजोर होनो हमनायसै। हजों डक्टरनि बिसियाबो गावनि फिसाइया इटिखौ नोजोर होनायखौ नुनानै बिहाबो निन गोमानो हमनायसै; गावखौनो रान्दि हिन्जावबादि सानलायग्रा जाथारबाय सिबाइया; सान्नैसोआवनो हामलं-लं, खाथं-थं जालायबाय। बेखौनो नुनानै ड. कसारिया बिसिखौ जोथोन लानो थाखाय इटिखौ नोजोर होनो बावगारनो गोनां जादोंमोन। बेबादि थासारियाव गावनि लागाम गोमानाय पि.एस.-खौ गलियाव लाबोफिननो थाखाय बियो फेइसबुकनिनो हेफाजाब लानो सान्नायसै मानोना बिहा दाबो गोसोआव दं जेब्लानिफ्राय इटिया फेइसबुकाव हाबदों अब्लानिफ्रायनो बियो सोलायलांनो हमदोंमोन। गिबि स्टेप हिसाबै बियो इटिनि फेइसबुक एकाउण्टनि पासवर्डखौ सिरि सिरि मिथिनो नाजानायसै। नाथाय नाजाब्लाबो मिथियैनि नैथि स्टेपाव बियो डाइरेक्टलि पासवर्डखौनो बिनायसै। अब्ला इटिया डक्टरनि बेबादि हाबाखौ साबजानाय मोनाखैसै। बियो डक्टरजों टटेलि आनकम्फरटेबोल फिल खालामनायसै। सानसेखालि हराव गावनि खथायावनो थानानै गोबां बाथ्रा सान्नायसै बियो आरो 10-सो रिंगायाव बिरदाउखौ हर्खाब फ’न खालामनानै बुंहरनायसै- “आं नोंखौ लोगो हमनो फैगासिनो दं बिरदाउ। आं आरो हार्सिङै सहायनो हालिया। आं अराइनि थाखाय नोंनाव फैगासिनो दं।” बिरदाउवा गावनि हास्थायसुला गोसोखौ एसे सुग्लायनाय मोन्नायसै आरो गावनि मटरसाइकेलखौ लानानै बिखौ लांफैनायसै। गावनि न’वाव लांनानै बिरदाउवा इटिजों हरसे थाल्ला रायज्लायनायसै।

हरसे थाल्ला बिरदाउजों रायज्लायनानै इटिनि देहाया गोहो गैयै जानायसै आरो बिरदाउजों बेरे-फुंजानि साहा कापसे लोंनानै बिरदाउखौ दान्दिसे उन्दुहैदो होन्नानै बियो मोनसे खथायाव से रिंगा जिरायनो होन्नानै हाबहैनायसै। हजों बिरदाउवा इटिखौ गावनि खाथियाव मोन्नानै रंजानायजोंनो खिनो ओंखारहां हासुनो ओंखारहां जालायथारदों। इटिखौ

 

 

 

 

आंखौ नागिरनानै…

रुजाब मुसाहारि

जायखिजाया मोन्दांथिनि बोथोराव

नोंनि गोरबोआव स्रोदै नागिरहैयै आं आंखौ

आंनि गोरबोआव नोंबो स्रोदै नायगिरखुमाफैनो हागोन नों दंना गैया

 

बेबादिनो मानसिनि गोबां गोरबोनि खंखर खंखर

आंखौ मोनोना मोना नागिरबायो आं इनभिजिबल महराव

नोंसोरबो नागिरफैनो हागोन जायखिजाया बोथोरावनो

आंनि खरानजों रानखावलांनाय गोरबोआवबो

गाव गावखौनो सिरि सिरियै नायखोमा नायखोमा मोनोना मोना

 

आं आंखौ गोरबो गोरबो गोबांनि गोरबो नायगिरना

खायसेनियाव लोगो मोनहैबाय आंनि मेगन थायसे

खायसेनियाव लोगो मोनहैबाय आंनि आखाइ फारसे

खायसेनियाव लोगो मोनहैबाय आंनि आथिं थोंसो

खायसेनियाव लोगो मोनहैबाय दा जेरै दं बेबादिनो

खायसेनियाव लोगो मोनहैबाय बबा जाना खुगा सिबाय थानाय

खायसेनियाव लोगो मोनहैबाय बिबायारि जाना बिबायबाय थानाय

खायसेनियाव लोगो मोनहैबाय खाना जाना माखौबा दांग्रोमबाय थानाय

खायसेनियाव लोगो मोनहैबाय आंनि सिमांखौ खाना साजा होनाय

खायसेनियाव लोगो मोनहैबाय आंनि सायाखौ फासि होनाय

खायसेनियाव लोगो मोनहैबाय जाबखोनाय जाहोनजों होसिनजाना थैना थानाय

खायसेनियाव आंनि थाखाय आं जेबोखौनो नुहैयाखिसै

 

बिसोरखौ आं मोजां मोनबाय…

बिसोरखौ आं गिबाय…

बिसोरखौ आं बागदावखांबाय…

 

आं मोनदांबाय

गासैनिबो थाखाय आं नङा

भारतारि गोजाम सल’, सल’न्थाइमाफोराव बिगियाननि फुंखा

ड° निजोम नारजारि

1.0 जागायनाय:

बुहुमनाङै जेरावबो मिथिजानाय भारतहा मोनसे रोहो-रोहो हारिमु आरो दोरों दं। बे बुहुमाव जिउखांनाय साफा-साफा आरो सोफ्रोमबो सुबुङा मावनां गुदि बिबान आरो थार लामाजों जिउखांनायनि सावगारिखौ बेद, पुरान आरो गोजाम सल’फोरा बेरखां होयो। गोजाम सल’ आरो सुबुं सल’ एबा खिरिमिनारि सल’फोरा  सुबुं थामोनथायनि मोनफा गोनांथार बाहागो। बेफोर थुनलाइनि जौगा महरा बुहुमनाङै गोबां बिजिसंगिरिफोरनि गोसोखौ जेब्लाबो बोगथाबबोदोंमोन।

1.1 थांखि:

बे बिजिरसङारि लिरबिदांनि गेजेरजों शिब पुरान,रामायण आरो महाभारतनि मोननैसो सल’फोरनि बिथिंखौ सावरायनायनि गेजेरजों लाइमोन फरायगिरिफोरनि थाखाय बिगियानारि जुक्ति सोनानै होनो नाजानाय जादों। मोनफ्रोमबो सलखौ जागायनायनि सिगां आथिखाल बिगियान-बिरोंदामिननि मोनफा बिथिंखौ फोरमायना सलआव बेऱखांनाय बिगियाननि फुंखाजों  सोमोन्दो फोरमायनाय जागोन। बे हाबानि गुबै थांखिया जादों लाइमोन फरायगिरिफोरनि गेजेराव बिगियाननि सोरजिलु निस्थार आखु सोरजिनो नाजानाय। बेनि गेजेरजों गथ’साफोरनि गोसोखौ थुलुंगा होनाय आरो लोगोसेनो गोदोनि भारतनि गोजों हारिमु आरो दोरोङारि हारिमुनि सोमोन्दै सिनायथि होनो नाजानाय। बे लिरबिदांनि गेजेरजों फोरमायनो हास्थायनाय बयनिख्रुयबो गोनांसिन हामब्लायथि रादाबा जादों  गोजाम हारिमुवारि दोरों आरो गोदान बिरोंदामिननि सरासनस्रा गियान होनानै लाइमोनफोरनो मोजां आखल फोरोंनाय आरो मोजां नोगोरारि जाहोनो हास्थानाय। सासे सुबुंनि उन्दै समनि जिउआव निस्थार आखु दानाय आरो बिगियानारि गोसोन्थि सोनानै होनाया जोबोर गोनांथार।

1.2 शिब पुरानआव अंग सोस्लायनाय (Organ transplantation):

अंग सोस्लायनाया जादों गोदान मुगानि सावस्रि बिगियाननि मोनसे बिखान्थि। बेनि गेजेरजों सासे मानसिनि बबेबा मोनसे अंगआ सोलियाबोब्ला गुबुन सासे मानसिनि अंगखौ सोस्लायना होयोब्ला फिन मोजां खामानियाव फैफिनो।बिदिन्थि महरै किडनी, बिखा,सफ्ल’ बिबु, मेगन बायदिखौ सोस्लायलायनो हायो।अदेबानि मेलेम, हारा बायदिखौ सोस्लायनो हाया। बे बिखान्थिनि थाखाय अंग होग्रा आरो  लाग्राया दाबसे जायगायाव थायोब्ला मोजांसिन जायो।

शिब पुरानआव बेरखांनाय अंग सोस्लायनाया जादों शिब आरो पार्बतीनि फिसाला गनेश। सल बादियै सानसेखालि पारबतीया गाव नआव दुगैनाय समाव रावबो हाफैयैनि थाखाय नन्दीखौ नेनो थिनदोंमोन। नाथाय बे समाव शिबआ नआव हाबफैनायाव नन्दीया बिखौ हाबहोनो गोनां जादोंमोन। पार्बतीया रागा जोंनानै गावनि दुगैनाय हालदै देग्लिनायनिफ्राय फोथायजाथाव फिसा महरै गनेशखौ सोरजिना बिखौबो गाव दुगैनायाव जाहाथे रावबा हाबफैनो हाया बेनि थाखाय नेनो बुङो। बे खेबावबो शिबआ नआव फैनाय समाव गनेशआ बिखौ होबथायो। सिनाय मोनै गथ’आ बे बादि खालामनायाव शिबआ जोबोर रागा जोङो आरो दावहा नांना गनेश खर’खौ दानस’ना नुस’यै जायगायाव गाहरदोंमोन।उनाव बे बाथ्राखौ मिथिनानै पार्बतीया जोबोर रागा जोंखांदोंमोन आरो बुहुमखौ सिलिंखार खालामनो हमदोंमोन। सोरजिगिरि ब्रह्माआ बिनि सेराव नुजाफैना बिखौ सुग्लायहोनो बुरखायदोंमोन। पार्बतीया मोननै रादाय दोंमोन, मोनसे रादाया जादोंमोन, गनेशखौ फोथां फिननांगौ आरो गुबुन मोनसेया जादोंमोन गनेशखौ गासै मोदायफोरनि गिबि फुजिनांगोन। शिबआ बे समाव रागाया सुग्लायबायमोन आरो पार्बतीनि रादायखौ गनायना लाना ब्रह्माखौ गनेशनि लायफिननो थिनदोंमोन। ब्रह्मा मासे मैदेरनि खर’खौ लाबोना बेनि खर’आव सोस्लायना होदोंमोन। शिबआ गनेशखौ फोथांफिनना गावनि फिसाला महरै गनायदोंमोन आरो गनपति महरै मान होदोंमोन।

1.3 रामायण सलन्थाइमायाव खौरांगिरिनि फुंखा:

आथिखाल मुगानि मख’जाथाव मोनसे बिथिङा जादों खौरांबिजों। बे दोरोङारि लिरनाय रादाब बिलाइ एबा मोब्विबारि बिजोंनि टि.भि बायदि नि बिजोंबो जानो हागौ। सुबुं खुंथाय एबा गनतन्त्रनि ब्रैथि खामफा। बे मोनसे हारि एबा हादरनि बिगियान,समाज बादिखौ लाफानानै गासै बिथिंनि जौगानायाव गोनांथार बिफाव लायो। भारतनि एबा बुहुमनि बयनिख्रुयबो गिबिसिन खौरांगिरिनि (जार्नालिष्ट) फुंखाखौ जों रामायण सल’न्थाइमायाव मोननो हायो। गेदेमा मुनि नारदआनो जानो हागौ बुहुमनि गिबिसिन खौरांगिरि। बिथाङा मोदाय,रायखस आरो गुबुनफोरनि गेजेराव मोनथाम मुलुग सोर्गो,मर्त आरो फाथालनि मोजां- गाज्रिनि खौरां फोसावलांदोंमोन।

1.3.1 रामायण सलन्थाइमायाव दालां लुनायनि बिरोंदामिन:

मोनसे हादरा जौगानांगौब्ला बो हाहरनि इसिंदाथाया(इनफ्राष्ट्राकसारा) जौगाथारनांगौ। इसिंदायनि गेजेराव गोग्लैयो लामा-सामा,दालां,मोब्लिबगोहो,मटर-गारि,फरायसालि बायदि बायदिनि राहा खालामनाय। रामायण सल’न्थाइमायाव दालां लुनायनि जौगा बिरोंदामिनखौ(टेगनलजिखौ) जों नुनो मोनो। लंकानि राजा राबणा सीताखौ खावनानै लांदोंमोन।बेनि जाउनाव राम आरो बेनि फाइखि हानजाया लंकाआव थांनो लैथो सायाव दांलां लुनो गोनां जादोंमोन। लैथोनि दैखौ थेनानै दालां लुनाया साननो हाथावै बाथ्रा। नाथाय बे दालांखौ लुनायनि बिरोंदामिनासो गिदिर बाथ्रामोन। बिगियाननि नोजोरजों बिजिरोब्ला जानो हागौ बे दालांखौ लुनायाव बाहायनाय अन्थाइफोरा अरगें हाजोनि बेरफ्रुनाय लाभानिफ्राय सोमजिनाय अन्थाइ(pumice stone) जाय दैयाव गोजावो। आमेरिकानि अख्रांमा बिजिरसं फसंथान नासाया राम सेटु एबा एदाम ब्रिसा दंमोन होनना फोरमान होदों। बिथांमोनहा सेटेलाइटजों 2002 माइयाव सेबखानाय सावगारियाव फोरमायनाय बादिब्ला बे दालाङा  1480 माइथायनि लैथोनि बारहुंखाजों बायदोंमोन।

1.3.2 रामायण सलन्थाइमायाव बिरखं(एरल्पेन) बिरोंदामिन:

रामायण सल’न्थाइमायाव बाहायनाय हान्था मेलानि राहाफोराबो नोजोर होथावनामोन। राबण पुष्पक रौरोथोना गराइजों सोलियोमोनब्वाबो बे बिरनोबो हायोमोन। बे बादि बिरनाय बिरोंदामिननिफ्रायनो जानोहोगौ आथिखालनि बिरखं डिङाया जोनोम मोनदोंमोन।

 

1.4 महाभारत सलन्थाइमायाव क्लनिं, आइ.भि.एफ(टेष्ट टिउब बेबी) बिरोंदामिन:

आथिखालाव सावस्रि बिगियाननि अबदान महरै गथ’-गथाइ गैजायैनि जिंगा सिनानै थानांनाय बिमा-बिफानि मोखाङाव मिनिस्लु महर होनो हानाय बिरोंदामिना जादों आइ.भि एफ(इनभाइट्र फारटाइलाइजेसन) जेराव बिमा-बिफानि बिदैखौ लानानै लेबलेटरायाव गलायना बिमानि गोरबोआव सोहरनाय जायो। बे बादिनो रोखोमसे जोलैनि रोखोमसे महर दिहुनफिननाया जादों क्ल’निं। बे बादि बिगियाननि बिरोंदामिना खृष्ट गिबि थाम रोजा बोसोर सिगांनो जादोंमोन होनना साननो हानायनि खाबुं दं। जोंनि सल’न्थाइमा महाभारतनि कौरबफोरखौ मोनसेल’ बिदै जिबख्रिखौ(embryo) फिसा फिसा बाहागो खालामना क्ल’निं खालामना जोनोम होदोंमोन। नङाब्ला सासे बिमा गान्धारीनि गोरबोनिफ्राय साजौसे बेबो फिसा हौवा गोजा जोनोम होनाया जानो हाथावा।

1.5 फोजोबनाय:

गोजोआव सावरायनानि गेजेरजों रोखा जाबायदि जोंनि भारातारि गोजाम सल’ सलन्थामाफोराव गोबां बिगियाननि फुंखा हाबनानै दं। जाखांबोनाय लाइमोन बिगियान मोजां मोनग्रा फरायसाफोरा बे बादि फुंखाफोरखौ संनानै गोदान बिजिरसंनो थुलुंगाखांनांगोन। बे बादि थुलुंगाजों हाबा मावलाङोब्ला हारि,माहारि आरो हादरजों लोगोसे दुलाराय सुबुं माहारिनि मोजां खामानि जोगोन।

***

जिउनि फेर्लेबसे गुमुर

सानसुमा बर’ 

सिग्लाबनानै दं
अखाफोर अखाफोर मोन्दांनाय
अखाफोर गोर्बो खथाफ्रा

थाखोमानानै दं
जिउमानि अख्रांमाबादि साया सावगारि
मोनसे बुब्लिनि आन्दो गाथोनाव

जोमै गाबनि मेगन
लाइगांनि गोर्बो
मोजोमसे आखाइनि थरथिंसे सिदोमा दै

बावगोमानै दं
सना’बादि दोंसे लामा
सिमांबादि मोनसे मोगथां सावगारि

गोरोबफ्लेनाय
मैनि समाइस्रि मेगन
मोनसे थांखि नेगोन जेब्लाबो।

 

 

लाइजाम आरो बिसम्बि

धीर्युज्योति

बेरेफुंजानि मेथाइ दोंसे ब्रा ब्रा गोसोआव फैदों….

“दानसोरां अखाफोर गावदां
दाखालि मोनाबिलियाव
नोंखौ नुदोंमोन आं नोंखौ नुदोंमोन आं
हांमानि दैमानि सेराव….’

मेथाइनि रिंऩाया खेबले खेबले गोसोखौ बोलांदों
बिसम्बिजों बिसम्बि जाबनानै थानाय मोनाबिलियाव…

एमनिफ्राय सिखारग्रोनमोना
गोजाम फाइल गांसे बोद्लादों आं
लाइजामजों आबुं जोख्लोबनानै दोननाय गोजाम फाइल

गारब्ला गारहरजासै
फबब्ला फबजासै
सावब्ला सावगारजासै

गोजाम लाइजामफोरा महर गुस्लाइबाय
गुफुरनिफ्राय गोमो जाबाय
हांखोफोरा नाथाय ख्रा ख्रासिन जाबाय
गोरबोनि थैसामसो जेन…
गोथां रेबगननि गोथां हांसो जेन…
थैनो रोंयै गोसोथोनायसो जेन…

नों हरनाय लाइजाम बेफोर….
(नों दा बबेयाव दं आं निथिया, आंनि इसोराबो)

खाखोर बिलाइयाव बाथाबनानै थानाय नोंनि आसिफोरा
दाबो गोसोथोनो फोरोंओ आंखौ साइखं जानानै
मोखथां मोदोमनाय नोंनि रावफोरा
दाबो उरसो उरसो गेलेयो मेगन मेगन
गोमो गाब नागिरो आलि आलि
गोथां गाब नागिरो दैमा दैमा
गोजा गाब नागिरो दरखं दरखं

नाथाय बुंनो बायो बाथारो
(नों दा आंनि सैनानै दोनजानाय बिसम्बिल’)
आयना मोखां नोंनि मेगन
गोथां निजोरा नोंनि राव
खानायनि गजरा आथिंनि गांग्रिं आखाइनि आसान मुथा
दबानि खुसि खाफालनि फोथा बुद्रुनाय दखना रोबै
बाज्रुमनाय खानाइ दुद्रुनाय फासोरा
मानोथो लाइजामनि हांखोयावनो जोबथा हां बोखो…
नोंलाय दा बबेयावथो महर सोलायखो?

सोनफ्रोम मोनाबिलियाव
जों दाउब’ बिरनाय नायनो थांओमोन गाथोनाव
(दा बे गाथोना गोथै जाबाय, नोंबादि)
हरै रुगुंआव रोमै रोमै सोरबा रोजाबोमोन बै मेथाइखौ
हालि हालि बिरलांनाय दाउब’फोराबो कराछ होलांओमोन
रंजाफुनाय जोंनि गोसोआबो सम सम देबोर नांओमोन
गाथोननि अऩ्थाइयाव मोसानाय दैयाबो गल’ नायोमोन
बिदिनो हायना होफैयोमोन हाबहां सानाबो…
नाथाय
नों दा बबे गाथोनाव दं…सोरनि थाखाय
मानो फोथैखो लाइजामावनो नोंनि आंनि गाथोन?

आं सानो फोजोबस्रांनो
(लाइजामजों लोगोसे नोंनि सैनानै दोनजानाय गोसोखांथि)
सानब्लाबो हायाखै बिखा सायो
दिन्दांना थायो आंनि गोरबोया बेयावनो समनि सुबादि
मैला थेवबो नायनो बाया
गाबो थेवबो आंगाया
नेवसियो थेवबो बोजबफिनो
खुद्रियो थेवबो अनफिनो
नायाब्ला थानो बोरै
बिलिराब्ला थानो बोरै
बेयावनो दं आंनि
गोथां लामा गोथै लामा
गाब गोनां लामा गाब गैयै लामा

नों दा बबेयाव दं आं मिथिया, आंनि इसोराबो…

 

 

आं मिबथिसलिया

  • -मोदाय गाहाय

    नों सेंथारलिया माथो
    मेरिलिन
    दाइ आ आंहा गैयाखोनो बुंजायो
    जोनोम सान दासों होन्नासो
    बुंदोंमोन आं
    बेनो खि गोरोन्थि
    अह ह’
    आं मिबथिसवासै
    आंनि मथर साइखेलनि सोदोब
    गोजान्नि
    आंनि राव खाथिनि
    फाराक गैयामोन
    दा सायखलुम गोलैब्लाबो
    नों थाल मोनलिया
    आं
    बिब्दि नंखायामोन
    आं नोंखो सिनायखायामोन
    आंनि गोसो अन्थाइ खामोन
    गोरबो हाग्राखामोन
    हाजो थिखिनिनि
    मै जाग्रासोमोन आं
    माखासे फोरा फेंबाय
    दद्र नांबाय
    गारजुब्बाइ गासैखौबो
    आं आंनि मुलुक आव
    थांफिन नायनि सोफनाय जादों
    नै सासे गोजाम लोगो सेराव
    सान्नाय खोथानि सुलु लानो
    जानांगो– मिबथिनो फैदो

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

SPREAD YOUR WINGS!

LET YOUR LITERATURE GO GLOBAL!

We gladly invite  Bodo authors, poets and critics to send your  literary works to AKSHRA  in your script  using Unicode fonts,

AKSHRA,  a multilingual online journal  enables your work to reach across the shores

AKSHRA  is a voluntary effort to spread and preserve Indian writing in digitised form. We are looking forward to your support

For details :

maalan@gmail. com

AKSHRA
error: Content is protected !!